Çadır, yuxu kisəsi, ayaqqabı: qayıdandan sonra nə etməli

Bahalı çadırın ikinci ilində yapışqan kimi soyulan örtüyü, yuxu kisəsinin "artıq isitmir" halı və ayaqqabının içindən gələn iy — bunların demək olar ki, hamısı sahədə yox, evdə, qayıdandan sonrakı bir neçə saatda yaranır.

Qayıdan kimi: birinci qayda

Heç nəyi nəm halda torbada saxlamayın. İki gün kifayətdir ki, kif başlasın, iy qalıcı olsun və su keçirməyən örtük parçalanmağa başlasın.

Gec saatda gəlmisinizsə, ən azı çantanı boşaldıb hər şeyi açıb yerə sərin. Detallı təmizlik sabah da olar; havalandırma bu gecə olmalıdır.

Çadır

1. Toz və qumu silkələyin; xüsusən fermuar yolunu təmizləyin — fermaturu ən çox öldürən şey qumdur.
2. Kölgədə, tam açıq halda qurudun. Birbaşa günəş çadırın ən böyük düşmənidir: UV parçanın liflərini və su keçirməyən qatı sıradan çıxarır. Bir neçə saatlıq sərt günəş bir mövsümlük istifadəyə bərabərdir.
3. Ləkəni yumşaq süngər və sadə su ilə silin. Adi kir yuyucu, maşın yuma, kondisioner — hamısı örtüyü zədələyir.
4. Tam quruyandan sonra yığın. Həmişə eyni xətlə qatlamayın — hər dəfə fərqli qatlayın ki, eyni yerdə çat açılmasın.
5. Saxlama: sərin, quru, qaranlıq yer. Sıx torbada uzun müddət saxlamaq əvəzinə boş bir parça torbaya qoymaq daha yaxşıdır.

Yuxu kisəsi

Kisəni öldürən şey sıxılmış halda saxlanmasıdır. Tük (down) və ya sintetik dolğu ay­larla sıxılı qalanda öz həcmini itirir, həcm isə istiliyin özüdür.

• Səfər üçün sıxma torbası, ev üçün böyük tənəffüs edən torba və ya asılmış vəziyyət.
• İçəri astar üçün sadə bir "liner" istifadə edin — kisəni yumaq ehtiyacını illərlə uzadır.
• Yumaq lazımdırsa: xüsusi yuyucu, ən yumşaq rejim, sonra maşında tennis topları ilə aşağı temperaturda qurutma. Tük topa yığılıbsa, kisə soyuq deməkdir.

Ayaqqabı

• Palçığı yaş halda, quruma­dan yuyun; quruyandan sonra fırçalamaq dərini cızır.
• İçliyi çıxarın və ayrıca qurudun. İyin mənbəyi demək olar ki, həmişə içlikdir.
• Radiator, soba, maşın üfürücüsü — heç biri olmaz. Yüksək temperatur yapışqanı və dərini korlayır, altlıq ayrılır. Otaq temperaturunda, kağızla doldurulmuş halda qurudun.
• Dəri model üçün mövsümdə bir-iki dəfə vaks/kondisioner; membranlı modellər üçün su itələyici (DWR) sprey.

Digər xırdalar

• Su kisəsi (hidrator): boş halda dondurucuda saxlamaq kif problemini tamam həll edir.
• Qaz balonu: yarımçıq balonları ayrıca yerdə saxlayın və üstünə nə qədər qaldığını yazın.
• Powerbank və fənər: uzun müddət saxlanacaqsa təxminən 50% doldurulmuş halda.
• İlk yardım çantası: hər mövsüm bir dəfə tarixləri yoxlayın.

Avadanlığı hələ almamısınızsa, ilk mövsümü icarə ilə keçirmək daha ağıllıdır — bu barədə: İlk kampın: nə lazımdır, nəyi kirayə götürmək daha ağıllıdır.